በአሜሪካን ሃገር በሚኖሩ ኢትዮጵያውያንና ትውልደ ኢትዮጵያውያን በተቋቋመው ሰላምና አንድነት ለኢትዮጵያ ማህበር አስተባባሪነት ለታላቁ የኢትዮጵያ ህዳሴ ግድብ ግንባታ ሃብት ለማሰባሰብና ለሃገር መከላከያ ሰራዊት ድጋፍ ለማሳየት ታላቅ የኢትዮጵያዊነት ትዕይንት በዋሽንግተን ዲሲ ተካሄደ።
በመድረኩ ላይ በዋሽንግተን የኢፌዴሪ ባለሙሉ ስልጣን አምባሳደር ክቡር አምባሳደር ፍጹም አረጋና በተባበሩት መንግስታት ድርጅት የኢፌዴሪ ቋሚ ተጠሪ ክቡር አምባሳደር ታዬ አጽቀስላሴ በክብር እንግድነት ተገኝተው መልዕክት አስተላልፈዋል።
ክቡር አምባሳደር ፍጹም አረጋ ባስተላለፉት መልዕክት መድረኩን ላመቻቹት አካላት ምስጋናቸውን አቅርበው፣ ዳያስፖራው የጀመረውን የፐብሊክ ዲፕሎማሲ ስራና ለመከላከያ ሰራዊት የሚያደርገውን ድጋፍ አጠናክሮ እንዲቀጥል ጠይቀዋል። አክለውም ባለፉት አስር ወራት ብቻ በድር ኢትዮጵያ እያከናወነ ያለውን ሃብት የማሰባሰብ ሂደት ሳይጨምር በአሜሪካን ሃገር የሚኖሩ ኢትዮጵያውያንና ትውልደ ኢትዮጵያውያንን በማስተባበር ለታላቁ የኢትዮጵያ ህዳሴ ግድብ ከ1.2 ሚሊዮን ዶላር በላይ መሰብሰቡን ገልጸው፣ በድር ኢትዮጵያም እስካሁን ያሰባሰበው ሃብት ከ785ሺ ዶላር በላይ መድረሱን አስገንዝበዋል። ክቡር አምባሳደሩ እየተደረገ ስላለው ድጋፍ አመስግነው፣ ዳያስፖራው ከድጋፍ ባሻገር በራሱም ሆነ የሌሎችን አቅም በማስተባበር በኢንቨስትመንት ዘርፎች ላይ ተሳትፎውን እንዲያሳድግ ጠይቀዋል።
ክቡር አምባሳደር ታዬ አጽቀስላሴም በበኩላቸው በመድረኩ ላይ እንዲሳተፉ በመጋበዛቸው አመስግነው፣ ዳያስፖራው ከሃገር ፍቅር በመነሳት እያከናወናቸው ያሉ ተግባራት የሚበረታቱ መሆናቸውን ገልጸዋል። ከታላቁ የኢትዮጵያ ህዳሴ ግድብ ጋር በተያያዘ የተጀመረው ትግል አለመጠናቁቅን አንስተው፣ ዳያስፖራው ከድግቡም ሆነ ከሌሎች የኢትዮጵያ ጥቅሞች አንጻር የሚያከናውናቸው ተግባራት ፍሬያማ እንዲሆኑ አንድነቱን በማጠናከርና ወዳጆችን በማብዛት እንዲንቀሳቀስ አሳስበዋል።
በመድረኩ ላይ የሃይማኖት አባቶች ተገኝተው ቢራኬ ያቀረቡ ሲሆን፣ ታዋቂ አርቲስቶችም ህዝቡን አነቃቅተዋል።